有好多人覺得,情人節一定唔可以單身,如果單身就簡就等同係世界末日…

我有個朋友,叫阿謙。佢好驚情人節單身,會夾硬搵個女仔過節日,所以佢拍極都係散拖,但唔知點解,佢每次都黑仔地每逢情人節就單身。就好似變咗「因為情人節來臨,所以變單身」咁。

「2月13日係兄弟日啊!出黎陪我食飯!」無錯,今年佢個女朋友都係捱唔到情人節呢條死線,於是我就陪佢食飯,然後去咗酒吧飲嘢。

其實唔單止情人節,早幾日條街已經逼滿慶祝節日嘅情侶,所以兩條麻甩佬喺餐廳門口等位,其實都幾尷尬。我見佢用怨恨嘅眼神望住班情侶。於是我同佢講…

「喂,其實所有節日對你黎講,都係末日…你諗吓有邊個節日唔係for一雙一對咁出街慶祝㗎?」

「嗚~我好想拍拖啊…」朋友幾乎喊出黎。

飲大兩杯,佢又拎住個電話磨一路自己塊面,一路同我講:「你有冇睇過套戲叫《觸不到的Her》?」

「你係咪中英文戲名混埋一齊。人地叫《Her》同《觸不到的她》…」

「是旦啦…我都想要一個咁嘅女朋友啊!究竟呢樣嘢幾時先發明到?我係咪註定成世都孤獨一生?」

「究竟你係想拍拖?定係想搵個伴?」我好認真咁問阿謙。

「有咩分別啊?」

「好似你咁,成日拍散拖,拍親都唔開心,都唔知你想點…」

「所以如果好似戲入面嗰個人工智能女友咁你話幾好呢?又瞭解我所有嘢,又善解人意,又唔洗我氹,又聰明,又唔驚會悶,仲會幫我打點生活上所有嘢…」

「咁不如你同Siri拍拖…」

「……」阿謙個樣變到好似粗口嘅像形文字咁。

「其實你唔需要亂咁求其搵個人拍拖,根本對方都唔適合你,夾硬一齊都無意思。」

「但我想拍拖嘛…」
「我問你啦,返工你開唔開心?」
「點會開心㗎…?」
「返夜校呢?」
「好攰,唔開心…」
「返屋企呢?」
「成日同屋企人嘈…」
「咁你唔認真揀個伴侶,人生除咗訓教之外,仲有咩時間係開心呢?」

「但我全日都忙到透唔到氣,邊有時候識人啊?所以我咪撞彩咁拍拖囉!」

其實阿謙又錯唔晒,香港人每日都忙到痴晒線,根本無時間去認識新圈子嘅人。就算識到只係點頭之交,因為你無咁多耐性去瞭解一個人,好多時…見到順眼咪拍拖,性格不合咪分手囉。

香港人由出生到老死乜都要趕,係一個速食城市,就連感情都係…
你撞到一個適合嘅,係好彩。
但係有幾多人有運行?

現實中阿謙真係恨拍拖恨到痴線,每個月都走去參加Speed Dating,每次拍唔夠一個月又分手。跟住又去參加另一次,完全係惡性遁環…

「不如你放慢個Speed,試吓Lunch Dating啦…」

「乜黎?」

「我同事參加過,只係Date咗一次Lunch,就同個女仔一齊咗,半年之後仲結咗婚添…」

「佢哋亂咁結婚啫!」

「又唔係喎,聽佢講Lunch Dating有專人導師幫佢配對,分析晒佢性格,同埋要求對象。唔係單單上網填資料,個個填到自己好似男神女神咁,出到黎又另外一回事。」

「係啊係啊!上次我約過一個,佢話自己似美人魚!!」

「Lunch Dating會有專人幫你配對好晒,起碼乎合你70%條件先畀你約出黎見面。當然啦你揀人、人揀你,你明嘅…」

「係咪堅㗎…?」

「第一次同導師見面免費㗎,佢浪費成粒鐘時間,你唔幫襯咪走囉,呃到你啲乜呢?」

於是,阿謙今日情人節就上咗去一間Lunch Dating嘅公司見導師,成唔成功?
唔知…或者下個月再同大家匯報情況。

我發現香港有好多阿謙呢類人,
想食快餐,大可以去蘭桂芳。
想求其搵個人拍拖可以去Speed dating。
但你想認真搵個伴,其實好難。
唔係話無錢無條件,而係無時間…

 

 

推薦倉位

 

 

 

更多迷你倉

 

創作者介紹

ministore12的部落格

ministore12 發表在 痞客邦 PIXNET 留言(0) 人氣()